ಕರಾಚಿ, ಡಿ.22: ಟಿ20 ಕ್ರಿಕೆಟ್ ಮೇಲೆ ಹೆಚ್ಚಿನ ಗಮನ ಹರಿಸುವ ಸಲುವಾಗಿ ಏಕದಿನ ಕ್ರಿಕೆಟ್ ಗೆ ಪಾಕಿಸ್ತಾನ ಕ್ರಿಕೆಟ್ ತಂಡದ ಆಲ್ ರೌಂಡರ್ ಶಾಹೀದ್ ಅಫ್ರಿದಿ ನಿವೃತ್ತಿ ಘೋಷಿಸಿದ್ದಾರೆ. 2015ರ ವಿಶ್ವಕಪ್ ಬಳಿಕ ಏಕದಿನ ಕ್ರಿಕೆಟ್ ಆಡುವುದಿಲ್ಲ ಎಂದು ಅಫ್ರಿದಿ ಘೋಷಿಸಿದ್ದಾರೆ.
'ನನ್ನ ಕ್ರಿಕೆಟ್ ಜೀವನದಲ್ಲಿ ಹಲವು ಏರಿಳಿತಗಳನ್ನು ನೋಡಿದ್ದೇನೆ. ಈ ಎಲ್ಲದರ ನಡುವೆಯೂ ನನಗೆ ನನ್ನ ಕ್ರಿಕೆಟ್ ಬದುಕಿನ ಬಗ್ಗೆ ಸಂತೃಪ್ತಿ ಇದೆ. ಏಕದಿನ ಕ್ರಿಕೆಟ್ ನಿಂದ ಹೆಮ್ಮೆಯಿಂದ ನಿವೃತ್ತಿ ಘೋಷಣೆ ಮಾಡಲು ಬಯಸಿದ್ದೆ. ನಾನು ಟಿ 20 ಪಂದ್ಯಗಳ ಮೇಲೆ ಹೆಚ್ಚಿನ ಗಮನ ಹರಿಸಲು ಬಯಸಿದ್ದೇನೆ ಎಂದು ಪತ್ರಿಕಾಗೋಷ್ಠಿಯಲ್ಲಿ ಹೇಳಿದ್ದಾರೆ.
ಫೆಬ್ರವರಿ 14 ರಿಂದ ಮಾರ್ಚ್ 29ರ ವರೆಗೆ ಆಸ್ಟ್ರೇಲಿಯಾ ಮತ್ತು ನ್ಯೂಜಿಲೆಂಡ್ ನಲ್ಲಿ ವಿಶ್ವಕಪ್ ಕ್ರಿಕೆಟ್ ಟೂರ್ನಿ ನಡೆಯಲಿದೆ. ಈ ಟೂರ್ನಿ ನಂತರ ಅಫ್ರಿದಿ ಅಂತಾರಾಷ್ಟ್ರೀಯ ಏಕದಿನ ಪಂದ್ಯಗಳಲ್ಲಿ ಕಾಣಿಸಿಕೊಳ್ಳುವುದಿಲ್ಲ.
ನೈರೋಬಿಯಲ್ಲಿ ಕೀನ್ಯಾ ವಿರುದ್ಧ 1996ರಲ್ಲಿ ಅಕ್ಟೋಬರ್ 2ರಂದು ನಡೆದ ಪಂದ್ಯದೊಂದಿಗೆ ಅಫ್ರಿದಿ ಏಕದಿನ ಅಂತಾರಾಷ್ಟ್ರೀಯ ಟೂರ್ನಿಗೆ ಪಾದಾರ್ಪಣೆ ಮಾಡಿದ್ದರು. ಏಕದಿನ ಪ್ರವೇಶ ಮಾಡಿದ ಮೂರು ದಿನಗಳಲ್ಲೇ ಅವರು ವಿಶ್ವದಾಖಲೆ ಸಾಧನೆ ಮಾಡಿದ್ದರು.
ಟ್ವಿಟ್ಟರ್ ನಲ್ಲಿ ನಿವೃತ್ತಿ ಬಗ್ಗೆ ಅಫ್ರಿದಿ ಹೇಳಿದ್ದು ಹೀಗೆ:
Thank you so much for all your support and prayers throughout my ODI career... it means alot to me.. love you all !😊
— Shahid Afridi (@SAfridiOfficial) December 21, 2014
At initials of my career stand off to Wasim Akram,Saeed Anwar,Ramiz Raja,M.khan,Waqar Yunus,Inzamam for their endeavouring support.
— Shahid Afridi (@SAfridiOfficial) December 21, 2014
ಒಟ್ಟು 389 ಏಕದಿನ ಪಂದ್ಯಗಳನ್ನಾಡಿರುವ ಪಾಕಿಸ್ತಾನದ ಆಲ್ರೌಂಡರ್ 23.49ರ ಸರಾಸರಿಯಲ್ಲಿ 7870 ರನ್ಗಳಿಸಿದ್ದಾರೆ. ಅಲ್ಲದೆ 391 ವಿಕೆಟ್ಗಳನ್ನೂ ಸಹ ಉರುಳಿಸಿದ್ದು, ಅತಿ ಹೆಚ್ಚು ವಿಕೆಟ್ ಪಡೆದವರ ಪೈಕಿ ಆರನೇ ಬೌಲರ್ ಅವರಾಗಿದ್ದಾರೆ. ವಿಶ್ವಕಪ್ ಟೂರ್ನಿ ಮುಗಿಯುವುದರೊಳಗೆ 400 ವಿಕೆಟ್ ಪಡೆಯುವ ಇರಾದೆ ಹೊಂದಿದ್ದಾರೆ. 2010ರಲ್ಲೇ ಪಾಕಿಸ್ತಾನ ಟೆಸ್ಟ್ ತಂಡದಿಂದ ಹೊರ ನಡೆದು ನಿವೃತ್ತಿ ಘೋಷಿಸಿದ್ದಾರೆ.(ಪಿಟಿಐ)