ಏಷ್ಯನ್ ಪ್ಯಾರಾ ಗೇಮ್ಸ್: ಜಾವೆಲಿನ್ ಥ್ರೋನಲ್ಲಿ ಭಾರತದ ಸಂದೀಪ್ ಗೆ ಬಂಗಾರ

ಜಕಾರ್ತಾ, ಅಕ್ಟೋಬರ್ 8: ಇಂಡೋನೇಷ್ಯಾದ ಜಕಾರ್ತಾದಲ್ಲಿ ನಡೆಯುತ್ತಿರುವ ಮೂರನೇ ಏಷ್ಯನ್ ಪ್ಯಾರಾ ಕ್ರೀಡಾಕೂಟದಲ್ಲಿ ಭಾರತದ ಜಾವೆಲಿನ್ ಥ್ರೋವರ್ ಸಂದೀಪ್ ಚೌಧರಿ ಅವರು ಭಾರತಕ್ಕೆ ಮೊದಲ ಬಂಗಾರ ಗೆದ್ದಿದ್ದಾರೆ.

ಸೋಮವಾರ (ಅಕ್ಟೋಬರ್ 8) ನಡೆದ ಪುರುಷರ ಜಾವೆಲಿನ ಥ್ರೋ ಎಫ್ 42-44/61-64 ವಿಭಾಗದ ಸ್ಪರ್ಧೆಯಲ್ಲಿ ಸಂದೀಪ್ 60.01 ಮೀಟರ್ ದೂರ ಈಟಿ ಎಸೆಯುವ ಮೂಲಕ ಚಿನ್ನಕ್ಕೆ ಮುತ್ತಿಕ್ಕಿದರು. ಈ ಕ್ರೀಡಾಕೂಟದಲ್ಲಿ ಭಾರತಕ್ಕೆ ಲಭಿಸಿದ ಮೊದಲ ಬಂಗಾರವಿದು.

ಪುರುಷರ 50 ಮೀ. ಬಟರ್ ಫ್ಲೈ (ಎಸ್ 7 ವಿಭಾಗ) ಈಜಿನಲ್ಲಿ ಸುರೇಶ್ ಜಾಧವ್ ಭಾರತಕ್ಕೆ ಎರಡನೇ ಬಂಗಾರ ಗೆದ್ದಿದ್ದಾರೆ. ಮಹಿಳಾ ವಿಭಾಗದ 1500 ಮೀ. ಓಟ(ಟಿ 11 ವಿಭಾಗದ)ದಲ್ಲಿ ರಕ್ಷಿತಾ ರಾಜು ಅವರಿಗೂ ಬಂಗಾರ ಲಭಿಸಿದೆ.

ಇನ್ನು ಪುರುಷರ ಪವರ್​ ಲಿಫ್ಟಿಂಗ್​ನ 49 ಕೆ.ಜಿ ವಿಭಾಗದಲ್ಲಿ ಭಾರತದ ಫರ್ಮಾನ್ ಬಾಶಾ ರಜತ ಪದಕ ಒಲಿದರೆ, ಪರಮಜೀತ್ ಕುಮಾರ್ ಅವರಿಗೆ ಕಂಚಿನ ಪದಕ ಲಭಿಸಿದೆ. ಪುರುಷರ ಫ್ರೀ ಸ್ಟೈಲ್ ಈಜಿನಲ್ಲಿ ಸ್ವಪ್ನಿಲ್ ಪಾಟಿಲ್ ಕಂಚು ಗೆದ್ದಿದ್ದಾರೆ.