ಕ್ಯಾನ್ಸರ್ ಜಾಗೃತಿಗಾಗಿ 'ಟಾಪ್ ಲೆಸ್' ಆದ ಟೆನಿಸ್ ತಾರೆ ಸೆರೆನಾ

ಸಿಡ್ನಿ, ಸೆಪ್ಟೆಂಬರ್ 30: ಸ್ತನ ಕ್ಯಾನ್ಸರ್ ಕುರಿತ ಜಾಗೃತಿಗಾಗಿ ಟೆನಿಸ್ ತಾರೆ ಸೆರೆನಾ ವಿಲಿಯಮ್ಸ್ ಅವರು ಟಾಪ್​ಲೆಸ್​ಆಗಿ ಪೋಸ್ ನೀಡಿದ್ದಾರೆ. ಜೊತೆಗೆ ಸಂದೇಶವನ್ನು ಸಾರುವ ಹಾಡೊಂದನ್ನು ಹಾಡಿದ್ದಾರೆ. ಸೆರೆನಾ ಹಾಕಿರುವ ಇನ್ಸ್ಟಾಗ್ರಾಮ್ ಪೋಸ್ಟ್ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಸಂಚಲನ ಮೂಡಿಸುತ್ತಿದೆ.

ಸೆರೆನಾ ಅವರು ಅಧಿಕೃತ ಇನ್​ಸ್ಟಾಗ್ರಾಂ ಖಾತೆಯಲ್ಲಿ ಹಾಕಿರುವ ವಿಡಿಯೋದಲ್ಲಿ, ಸೆರೆನಾ ತಮ್ಮ ಸ್ತನಗಳನ್ನು ಕೈನಿಂದ ಮುಚ್ಚಿಕೊಂಡು, 1991ರಲ್ಲಿ ಆಸ್ಟ್ರೇಲಿಯನ್ ಬ್ಯಾಂಡ್​ನ ಜನಪ್ರಿಯ ಗೀತೆಯೊಂದನ್ನು ಹಾಡುವುದನ್ನು ಕಾಣಬಹುದು.

ಸ್ತನ ಕ್ಯಾನ್ಸರ್​ ಕುರಿತ 'ಐ ಟಚ್​ ಮೈಸೆಲ್ಫ್' ಹಾಡನ್ನು ಬಳಸಿಕೊಂಡು, ಮಹಿಳೆಯರು ಸ್ತನ ಕ್ಯಾನ್ಸರ್ ಬಗ್ಗೆ ಜಾಗೃತರಾಗಿರಬೇಕು. ತಮ್ಮ ಸ್ತನಗಳನ್ನು ನಿಯಮಿತವಾಗಿ ಸ್ವಯಂ ಪರೀಕ್ಷಿಸಿಕೊಳ್ಲಬೇಕು. ಈ ಸ್ತನ ಕ್ಯಾನ್ಸರ್ ಜಾಗೃತಿ ತಿಂಗಳಲ್ಲಿ ನಾನು 'ಐ ಟಚ್ ಮೈಸೆಲ್ಫ್' ಆವೃತ್ತಿಯನ್ನು ರೆಕಾರ್ಡ್ ಮಾಡಿದ್ದೀನಿ ಎಂದು ಹೇಳಿಕೊಂಡಿದ್ದಾರೆ.

ಸ್ತನ ಕ್ಯಾನ್ಸರ್ ವಿಶ್ವದ ಎಲ್ಲ ವರ್ಣದ ಮಹಿಳೆಯರಿಗೂ ಹಾನಿ ಮಾಡುತ್ತದೆ. ಹಾಗಾಗಿ ಈ ಕುರಿತು ಜಾಗೃತಿ ಮೂಡಿಸಲು, ನನ್ನ ಕಂಫರ್ಟ್ ಝೋನ್​ನಿಂದ ಹೊರ ಬಂದು ಈ ವಿಡಿಯೋ ಮಾಡಬೇಕಾಯಿತು. ಪ್ರಾಥಮಿಕ ಹಂತದ ರೋಗದ ಪತ್ತೆ ಅನೇಕ ಜೀವಗಳನ್ನು ಉಳಿಸುವ ಕೀಲಿ ಎಂದು ಹೇಳಿಕೊಂಡಿದ್ದಾರೆ.

ಸೆರೆನಾ ಈ ವಿಡಿಯೋ ಪೋಸ್ಟ್ ಮಾಡಿದ 10 ಗಂಟೆಯೊಳಗೆ 1.3 ಮಿಲಿಯನ್​ಬಾರಿ ವೀಕ್ಷಿಸಲಾಗಿದೆ. ಹಾಗೇ ನೆಟ್ಟಿಗರು ಸೆರೆನಾ ಕಾರ್ಯಕ್ಕೆ ಮತ್ತು ಹಾಡಿಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಸೆರೆನಾ ಅವರ ದಿಟ್ಟತನ ಹಾಗೂ ಜಾಗೃತಿ ಮೂಡಿಸುವ ವಿಧಾನಕ್ಕೆ ಭಾರಿ ಮೆಚ್ಚುಗೆ ವ್ಯಕ್ತವಾಗಿದೆ.

ಯುಎಸ್ ಓಪನ್ ಫೈನಲ್ ಪಂದ್ಯ ಸೋತು, ಸಿಟ್ಟಿಗೆದ್ದು ರಂಪಾಟ ಮಾಡಿಕೊಂಡಿದ್ದ ಸೆರೆನಾ ಅವರು ನಾಲ್ಕು ದಿನಗಳ ಮುಂಚೆ ತಮ್ಮ 37ನೇ ಹುಟ್ಟುಹಬ್ಬವನ್ನು ಆಚರಿಸಿಕೊಂಡಿದ್ದಾರೆ.