ಯುಎಸ್ ಓಪನ್: ನಡಾಲ್‌ಗೆ ಆಘಾತ ನೀಡಿದ ಫ್ರಾನ್ಸಿಸ್ ಟೈಫೋ: 4ನೇ ಸುತ್ತಿನಲ್ಲಿ ಹೊರಬಿದ್ದ ದಿಗ್ಗಜ

ಫ್ರಾನ್ಸಿಸ್ ಟೈಫೋ ಭರ್ಜರಿ ಪ್ರದರ್ಶನ

ರಾಫೆಲ್ ನಡಾಲ್ ಹಾಗೂ ಫ್ರಾನ್ಸಿಸ್ ಟೈಫೋ ಇದಕ್ಕೂ ಮುನ್ನ ಎರಡು ಬಾರಿ ಮೂಖಾಮುಖಿಯಾಗಿದ್ದರು. ಆ ಎರಡು ಬಾರಿಯೂ ರಾಫೆಲ್ ನಡಾಲ್ ಗೆಲುವು ಸಾಧಿಸಿದ್ದರು. ಆದರೆ ಈ ಬಾರಿ ದಿಗ್ಗಜ ಆಟಗಾರನಿಗೆ 24ರ ಹರೆಯದ ಯುವ ಆಟಗಾರ ಅದ್ಭುತ ಪೈಪೋಟಿ ನೀಡಿದ್ದು ಸೋಲಿನ ರುಚಿ ತೋರಿಸಿದ್ದಾರೆ. 6-4, 4-6, 6-4, 6-3 ಅಂತರದಿಂದ ಫ್ರಾನ್ಸಿಸ್ ಟೂಫೋ ಗೆಲುವು ಸಾಧಿಸಿದ್ದಾರೆ.

ಬಲಿಷ್ಠ ಪ್ರದರ್ಶನ ನೀಡಿದ ಯುವ ಆಟಗಾರ

ಅಮೆರಿಕದ ಆಟಗಾರ ಪಂದ್ಯದುದ್ದಕ್ಕೂ ಬಲಿಷ್ಠವಾಗಿ ಕಂಡು ಬಂದಿದ್ದರು. ಈ ಮುಖಾಮುಖಿಯಲ್ಲಿ ನಡಾಲ್ ಅವರ ಸರ್ವ್ ಅನ್ನು ಎಂಟರಲ್ಲಿ ಐದು ಬಾರಿ ಬ್ರೇಕ್ ಮಾಡುವಲ್ಲಿ ಯಶಸ್ವಿಯಾಗಿದ್ದಾರೆ. ಸ್ಪೇನ್‌ನ ದಿಗ್ಗಜ ಆಟಗಾರ ರಾಫೆಲ್ ನಡಾಲ್ ಅವರ ಕೆಲವು ಕಳಪೆ ಸರ್ವಿಂಗ್ ಮತ್ತು ರಿಟರ್ನ್ ಪ್ರದರ್ಶನವನ್ನು ಅದ್ಭುತವಾಗಿ ಬಳಸಿಕೊಂಡ ಟೈಫೋ ಎದುರಾಳಿಯನ್ನು ಹಿಮ್ಮೆಟ್ಟಿಸುವಲ್ಲಿ ಯಶಸ್ವಿಯಾದರು. ಈ ಮುಖಾಮುಖಿಯಲ್ಲಿ ನಡಾಲ್ ಒಟ್ಟು ಒಂಬತ್ತು ಡಬಲ್ ಫಾಲ್ಟ್‌ಗಳನ್ನು ಮಾಡಿದ್ದಾರೆ.

ಎರಡನೇ ಸೆಟ್ ನಡಾಲ್ ವಶಕ್ಕೆ

ಟೈಫೋ ಈ ಪಂದ್ಯದಲ್ಲಿ ಆರಂಭದಿಂದಲೂ ಹಿಡಿತ ಸಾಧಿಸುವಲ್ಲಿ ಯಶಸ್ವಿಯಾಗಿದ್ದರು. ಮೊದಲ ಸೆಟ್ ಅನ್ನು 6-4 ಅಂಕಗಳೊಂದಿಗೆ ವಶಕ್ಕೆ ಪಡೆದ ಬಳಿಕ ಎರಡನೇ ಸೆಟ್‌ನಲ್ಲಿ ನಡಾಲ್ ಕಮ್‌ಬ್ಯಾಕ್ ಮಾಡಿದರು. ಎರಡನೇ ಸೆಟ್ 6-4 ಅಂತರದಿಂದ ನಡಾಲ್ ವಶವಾಯಿತು. ಆದರೆ ಮುಂದಿನ ಎರಡು ಸೆಟ್‌ಗಳಲ್ಲಿ ನಡಾಲ್ ಅವರನ್ನು ಮತ್ತೆ ಹಿಮ್ಮೆಟ್ಟಿಸಿದ ಅಮೆರಿಕಾದ ಯುವ ಆಟಗಾರ ಗೆಲುವು ಸಾಧಿಸಿದರು.

ನಡಾಲ್ ಸಾರ್ವಕಾಲಿಕ ಶ್ರೇಷ್ಠ ಆಟಗಾರ ಎಂದ ಟೈಫೋ

ಇನ್ನು ಈ ಪಂದ್ಯದಲ್ಲಿ ಭರ್ಜರಿ ಗೆಲುವು ಸಾಧಿಸಿದ ಬಳಿಕ ಮಾತನಾಡಿದ ಫ್ರಾನ್ಸಿಸ್ ಟೈಫೋ ತಮ್ಮ ಸಂತಸವನ್ನು ವ್ಯಕ್ತಪಡಿಸಿದ್ದಾರೆ. ಈ ಗೆಲುವಿನಿಂದಾಗಿ ತಾನು ಭಾವುಕನಾಗಿದ್ದೇನೆ ಎಂದು ಹೇಳಿರುವ ಟೈಫೋ ಈ ಗೆಲುವು ನಂಬಲು ಸಾಧ್ಯವಾಗುತ್ತಿಲ್ಲ ಎಂದಿದ್ದಾರೆ. "ನನಗೆ ಈ ಸಂದರ್ಭದಲ್ಲಿ ಏನು ಹೇಳಬೇಕೆಂದು ತಿಳಿಯುತ್ತಿಲ್ಲ. ಖುಷಿಗೂ ಮೀರಿದ ಅನುಭವವಾಗುತ್ತಿದೆ. ಬಹುತೇಕ ಕಣ್ಣೀರು ಬರುತ್ತಿದೆ. ನನಗೆ ಇದನ್ನು ನಂಬಲು ಸಾಧ್ಯವಾಗುತ್ತಿಲ್ಲ. ಅವರು ಸಾರ್ವಕಾಲಿಕ ಶ್ರೇಷ್ಠ ಆಟಗಾರರಲ್ಲಿ ಖಂಡಿತವಾಗಿಯೂ ಒಬ್ಬರಾಗಿದ್ದಾರೆ. ನಾನಿಂದು ನಂಬಲು ಸಾಧ್ಯವಾಗದ ಪ್ರದರ್ಶನ ನೀಡಿದ್ದೇನೆ. ಏನಾಯಿತು ಎಂದು ನನಗೇ ತಿಳಿಯಲಿಲ್ಲ"ಎಂದಿದ್ದಾರೆ ಯುಎಸ್‌ನ ಯುವ ಆಟಗಾರ.