ವಿಂಡೀಸ್ ನಾಯಕನ ವಿರುದ್ಧ ಚೋಪ್ರ ಕಿಡಿ
ಮಾಜಿ ಕ್ರಿಕೆಟಿಗ ಹಾಗೂ ಹಾಲಿ ಕಾಮೆಂಟೇಟರ್ ಆಕಾಶ್ ಚೋಪ್ರ ಈ ಸರಣಿಯಲ್ಲಿ ನೀಡಿದ ಕಳಪೆ ಪ್ರದರ್ಶನಕ್ಕೆ ಕಿಡಿ ಕಾರಿದ್ದು ಬೇರೆ ಯಾರ ಮೇಲೂ ಅಲ್ಲ. ವೆಸ್ಟ್ ಇಂಡೀಸ್ ತಮಡದ ನಾಯಕ ಕಿರಾನ್ ಪೊಲಾರ್ಡ್ ವಿರುದ್ಧ. ಬ್ಯಾಟಿಂಗ್ ಹಾಗೂ ಬೌಲಿಂಗ್ ಎರಡೂ ವಿಭಾಗದಲ್ಲಿಯೂ ಪೊಲಾರ್ಡ್ ಉತ್ತಮ ಪ್ರದರ್ಶನ ನೀಡಲು ವಿಫಲವಾಗಿದ್ದಾರೆ. ಕೇವಲ ಆಟಗಾರನಾಗಿ ಮಾತ್ರವಲ್ಲ ನಾಯಕನಾಗಿಯೂ ಪೊಲಾರ್ಡ್ ವಿಫಲವಾಗಿದ್ದಾರೆ ಎಂದು ಆಕಾಶ್ ಚೋಪ್ರ ಟೀಕಿಸಿದ್ದಾರೆ.
2 ಏಕದಿನ ಪಂದ್ಯಗಳಿಂದ ಹೊರಗುಳಿದಿದ್ದ ಪೊಲಾರ್ಡ್
ವೆಸ್ಟ್ ಇಂಡೀಸ್ ವೈಟ್ಬಾಲ್ ತಂಡದ ನಾಯಕ ಕಿರಾನ್ ಪೊಲಾರ್ಡ್ ಭಾರತ ವಿರುದ್ಧದ ಏಕಸಿನ ಸರಣಿಯ ಅಂತಿಮ ಎರಡು ಪಂದ್ಯಗಳಲ್ಲಿ ಗಾಯದ ಕಾರಣದಿಂದಾಗಿ ಕಣಕ್ಕಿಳಿದಿರಲಿಲ್ಲ. ಈ ಪಂದ್ಯದಲ್ಲಿ ನಿಕೋಲಸ್ ಪೂರನ್ ತಂಡವನ್ನು ಮುನ್ನಡೆಸಿದ್ದರು. ಟಿ20 ಸರಣಿಯಲ್ಲಿ ಆಡಲಿಳಿದ ಪೊಲಾರ್ಡ್ ನಿರ್ಣಾಯಕ ಆಟ ಪ್ರದರ್ಶಿಸಲು ವಿಫಲವಾಗಿದ್ದರು. ಈ ಟಿ20 ಸರಣಿಯಲ್ಲಿ ಕೂಡ ವೆಸ್ಟ್ ಇಂಡೀಸ್ ವೈಟ್ವಾಶ್ಗೆ ಒಳಗಾಯಿತು.
ಉತ್ಸಾಹವಿದ್ದಂತೆಯೇ ಕಾಣಿಸಲಿಲ್ಲ!
ಆಕಾಶ್ ಚೋಪ್ರ ತಮ್ಮ ಯೂಟ್ಯೂಬ್ ಚಾನೆಲ್ನಲ್ಲಿ ಕೆರೀಬಿಯನ್ ತಂಡದ ಕೆಲ ಆಟಗಾರರ ಪ್ರದರ್ಶನವ ಬಗ್ಗೆ ಮಾತನಾಡುತ್ತಾ ಪ್ರತಿಕ್ರಿಯೆ ನೀಡಿದ್ದಾರೆ. ಈ ಸಂದರ್ಭದಲ್ಲಿ ಪೊಲಾರ್ಡ್ ಬಗ್ಗೆ ಕೂಡ ಅಭಿಪ್ರಾಯವನ್ನು ಹಂಚಿಕೊಂಡರು. "ಕಿರಾನ್ ಪೊಲಾರ್ಡ್ ಈ ಸರಣಿಯಲ್ಲಿ ಸ್ವಲ್ಪವೂ ಉತ್ಸಾಹದಲ್ಲಿದ್ದಂತೆ ಕಾಣಿಸಲೇ ಇಲ್ಲ. ಅವರು ಬೌಲಿಂಗ್ ಕೂಡ ಮಾಡಲಿಲ್ಲ. ಬ್ಯಾಟಿಂಗ್ ಮಾಡಲು ಕಣಕ್ಕಿಳಿದಾಗ ಹಿಂದಿನ ಆಟಗಾರನಂತೆ ಆತ ಕಂಡು ಬರಲಿಲ್ಲ. ಆತ ಮುಂಬೈ ಇಂಡಿಯನ್ಸ್ ಪರವಾಗಿ ಇದಕ್ಕಿಂತ ಹೆಚ್ಚು ಉತ್ತಮ ಆಟಗಾರ ಎನಿಸಿಕೊಳ್ಳುತ್ತಾರೆ" ಎಂದು ಆಕಾಶ್ ಚೋಪ್ರ ಹೇಳಿಕೆ ನೀಡಿದ್ದಾರೆ.
ಇತರ ಆಟಗಾರರಿಗೆ ಸ್ಪೂರ್ತಿ ನೀಡುವುದಿಲ್ಲ!
ಪ್ರಾಮಾಣಿಕವಾಗಿ ಹೇಳುತ್ತಿದ್ದೇನೆ, ಆತ ವೆಸ್ಟ್ ಇಂಡೀಸ್ ಪರವಾಗಿ ಆಡುವಾಗ ತನ್ನ ಸಾಮರ್ಥ್ಯದ ಅರ್ಧದಷ್ಟು ಮಾತ್ರವೇ ಆಡುತ್ತಿದ್ದಾರೆ ಎನಿಸುತ್ತದೆ. ಅದು ನೀವು ಟಿ20 ವಿಶ್ವಕಪ್ನಲ್ಲಿ ಆಡಿದ್ದನ್ನು ನೋಡಿದಾಗ ಅಥವಾ ಇಲ್ಲಿ ನೀಡಿದ ಪ್ರದರ್ಶನವನ್ನು ನೋಡಿದಾಗ ಹೀಗೆಯೇ ಅನಿಸಿತು. ಅದು ನಾಯಕನಾಗಿ ಫೀಲ್ಡಿಂಗ್ ನಿಲ್ಲಿಸುವಾಗ ಆಗಿರಬಹುದು ಅಥವಾ ಬೌಲಿಂಗ್ ಮಾಡದ ಬಗ್ಗೆ ಆಗಿರಬಹುದು. ಇದು ತಂಡದ ಇತರ ಆಟಗಾರರಿಗೆ ಸ್ಪೂರ್ತಿ ನೀಡುವುದಿಲ್ಲ" ಎಂದು ಆಕಾಶ್ ಚೋಪ್ರ ಹೇಳಿದ್ದಾರೆ. ಮೂರು ಪಂದ್ಯಗಳ ಟಿ20 ಸರಣಿಯಲ್ಲಿ ಕಿರಾನ್ ಪೊಲಾರ್ಡ್ ಗಳಿಸಿದ್ದು ಕೇವಲ 32 ರನ್ ಮಾತ್ರ. ಅದು ಕೂಡ 110.34ರ ಸ್ಟ್ರೈಕ್ರೇಟ್ನಲ್ಲಿ. ಇನ್ನು ಈ ಸರಣಿಯಲ್ಲಿ ಹಾಕಿದ್ದ ಏಕೈಕ ಓವರ್ನಲ್ಲಿ ಪೊಲಾರ್ಡ್ 14 ರನ್ ನೀಡಿದ್ದರು.