ಟಿ20 ವಿಶ್ವಕಪ್ ಮರುವೇಳಾಪಟ್ಟಿಗೆ ಪಾಕಿಸ್ತಾನ ಕ್ರಿಕೆಟ್‌ ಬೆಂಬಲವಿಲ್ಲ

ಲಾಹೋರ್, ಮೇ 27: ಈ ವರ್ಷ ನಡೆಯಬೇಕಿರುವ ಟಿ20 ವಿಶ್ವಕಪ್‌ ಟೂರ್ನಿಯನ್ನು ಮುಂದಿನ ವರ್ಷಕ್ಕೆ ಮುಂದೂಡಿ, ಮರು ವೇಳಾಪಟ್ಟಿ ತಯಾರಿಸುವ ನಿಟ್ಟಿನಲ್ಲಿ ಪಾಕಿಸ್ತಾನ ಕ್ರಿಕೆಟ್ ಬೋರ್ಡ್‌ (ಪಿಸಿಬಿ) ಯಾವುದೇ ರೀತಿಯಲ್ಲಿ ಬೆಂಬಲಿಸುತ್ತಿಲ್ಲ ಎಂದು ಪಾಕಿಸ್ತಾನ ಕ್ರಿಕೆಟ್ ಬೋರ್ಡ್ (ಪಿಸಿಬಿ) ಹೇಳಿದೆ. ಕೊರೊನಾವೈರಸ್ ಕಾರಣ ಟಿ20 ವಿಶ್ವಕಪ್ ವೇಳಾಪಟ್ಟಿ ಬದಲಾಗುವುದರಲ್ಲಿದೆ.

ಟಿ20 ವಿಶ್ವಕಪ್ ಟೂರ್ನಿಯ ವೇಳಾಪಟ್ಟಿ ಬದಲಾದರೆ ಅಂತಾರಾಷ್ಟ್ರೀಯ ಕ್ಯಾಲೆಂಡರ್‌ನ ಎಲ್ಲಾ ಪಂದ್ಯಗಳಿಗೆ ಹೊಡೆತ ಬೀಳುವುದರಿಂದ ನಾವು ಪ್ರತಿಷ್ಠಿತ ಟೂರ್ನಿಯ ಮರು ವೇಳಾಪಟ್ಟಿಗೆ ಬೆಂಬಲಿಸುತ್ತಿಲ್ಲ ಎಂದು ಪಾಕ್ ಕ್ರಿಕೆಟ್‌ ಬೋರ್ಡ್‌ ತಿಳಿಸಿದೆ. ಈಗಿನ ವೇಳಾಪಟ್ಟಿ ಪ್ರಕಾರ ಟಿ20 ವಿಶ್ವಕಪ್‌ ಅಕ್ಟೋಬರ್‌ನಿಂದ ನವೆಂಬರ್ ಮಧ್ಯೆ ನಡೆಯಲಿದೆ.

ವರ್ಲ್ಡ್ ಟಿ20 ಟೂರ್ನಿ ನಡೆಸುವ ಬಗ್ಗೆ ಚರ್ಚಿಸಲು ಗುರುವಾರ (ಮೇ 28) ಇಂಟರ್ ನ್ಯಾಷನಲ್ ಕ್ರಿಕೆಟ್ ಕೌನ್ಸಿಲ್ ಸಭೆ ನಡೆಸಲಿರುವುದರಿಂದ, ಅಲ್ಲಿ ಏನಾಗಲಿದೆ ಎಂದು ಕಾದು ನೋಡುವ ನಿಲುವಿಗೆ ಪಾಕಿಸ್ತಾನವಿದೆ ಎಂದು ಪಿಸಿಬಿ ಅಧಿಕಾರಿಯೊಬ್ಬರು ಹೇಳಿದ್ದಾರೆ.

'ನಾವಿನ್ನೂ ಮೇ ತಿಂಗಳಲ್ಲಿದ್ದೇವೆ. ಹಿಂದಿನ ವೇಳಾಪಟ್ಟಿಯ ಪ್ರಕಾರ ಟಿ20 ವಿಶ್ವಕಪ್‌ ನಡೆಯಲು ಇನ್ನೂ ಬಹಳಷ್ಟು ಕಾಲಾವಕಾಶವಿದೆ. ಕೊನಾವೈರಸ್ ಪಿಡುಗಿನ ಸಂದರ್ಭ ಎಲ್ಲಿಯವರೆಗೆ ಹೋಗಲಿವೆ ಎಂದು ಐಸಿಸಿ ಸದಸ್ಯರು ಕಾದು ನೋಡಲಿದ್ದಾರೆ. ಎರಡು ತಿಂಗಳ ನಂತರವೂ ಈವೆಂಟ್ ಅನ್ನು ನಡೆಸುವ ಬಗ್ಗೆ ನಿರ್ಧಾರ ತೆಗೆದುಕೊಳ್ಳಬಹುದು,' ಎಂದು ಅಧಿಕಾರಿ ಮಾಹಿತಿ ನೀಡಿದ್ದಾರೆ.