WTC Final: ನ್ಯೂಜಿಲೆಂಡ್‌ಗೆ ಲಾಭ, ಭಾರತಕ್ಕೆ ನಷ್ಟ; ಯುವರಾಜ್ ಸಿಂಗ್ ಅಸಮಾಧಾನ

ನ್ಯೂಜಿಲೆಂಡ್‌ಗೆ ತೊಂದರೆಯಾಗುವುದಿಲ್ಲ

ಭಾರತದ ವಿರುದ್ಧ ವಿಶ್ವ ಟೆಸ್ಟ್ ಚಾಂಪಿಯನ್‍ಶಿಪ್ ಫೈನಲ್ ಪಂದ್ಯ ಆಡುವ ಮುನ್ನ ಇಂಗ್ಲೆಂಡ್ ವಿರುದ್ಧ ನ್ಯೂಜಿಲೆಂಡ್ ತಂಡ 2 ಟೆಸ್ಟ್ ಪಂದ್ಯಗಳನ್ನು ಆಡುವುದರಿಂದ ನ್ಯೂಜಿಲೆಂಡ್ ಆಟಗಾರರಿಗೆ ಇಂಗ್ಲೆಂಡ್ ಪಿಚ್‌ನ ಅನುಭವವಾಗಲಿದೆ. ಹೀಗಾಗಿ ನ್ಯೂಜಿಲೆಂಡ್ ತಂಡಕ್ಕೆ ಯಾವುದೇ ರೀತಿಯ ತೊಂದರೆಯಾಗುವುದಿಲ್ಲ ಎಂದು ಯುವರಾಜ್ ಸಿಂಗ್ ಹೇಳಿದ್ದಾರೆ.

ಭಾರತೀಯರಿಗೆ ಬಲುಕಷ್ಟ

ಟೀಮ್ ಇಂಡಿಯಾ ಆಟಗಾರರು ಯಾವುದೇ ಪಂದ್ಯವನ್ನು ಆಡದೆ ನ್ಯೂಜಿಲೆಂಡ್ ತಂಡದ ವಿರುದ್ಧ ನೇರವಾಗಿ ವಿಶ್ವ ಟೆಸ್ಟ್ ಚಾಂಪಿಯನ್‍ಶಿಪ್ ಫೈನಲ್ ಪಂದ್ಯವನ್ನು ಆಡಲಿದ್ದು ಕಷ್ಟವನ್ನು ಎದುರಿಸುವುದು ಖಚಿತ ಎಂದು ಯುವರಾಜ್ ಸಿಂಗ್ ಹೇಳಿದ್ದಾರೆ. ಅದರಲ್ಲಿಯೂ ಆರಂಭಿಕ ಆಟಗಾರರಾದ ರೋಹಿತ್ ಶರ್ಮಾ ಮತ್ತು ಶುಬ್ಮನ್ ಗಿಲ್ ಇಂಗ್ಲೆಂಡ್ ನೆಲದಲ್ಲಿ ಆರಂಭಿಕ ಆಟಗಾರರಾಗಿ ಯಾವುದೇ ಟೆಸ್ಟ್ ಪಂದ್ಯವನ್ನಾಡಿಲ್ಲ. ಹೀಗಾಗಿ ಟೀಮ್ ಇಂಡಿಯಾ ಸಂಕಷ್ಟಕ್ಕೆ ಒಳಗಾಗಲಿದೆ ಎಂದು ಯುವರಾಜ್ ಸಿಂಗ್ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

3 ಪಂದ್ಯಗಳಾಗಿದ್ದರೆ ಸರಿಯಾಗಿರುತ್ತಿತ್ತು

ಅತ್ತ ನ್ಯೂಜಿಲೆಂಡ್ ತಂಡ ಇಂಗ್ಲೆಂಡ್ ವಿರುದ್ಧ 2 ಪಂದ್ಯಗಳನ್ನಾಡಿ ಅನುಭವ ಹೊಂದಿರುತ್ತದೆ, ಆದರೆ ಭಾರತ ತಂಡ ಯಾವುದೇ ಅನುಭವವನ್ನು ಹೊಂದಿರದೆ ಫೈನಲ್ ಪಂದ್ಯವನ್ನಾಡಲಿದೆ. ಹೀಗಾಗಿ ಒಂದೇ ಒಂದು ಫೈನಲ್ ಪಂದ್ಯವನ್ನು ಆಡಿಸುವ ಬದಲು 3 ಪಂದ್ಯಗಳ ಸರಣಿಗಳನ್ನಾಡಿಸಿ ಸರಣಿಯಲ್ಲಿ ಜಯಗಳಿಸಿದವರನ್ನು ವಿಜೇತರೆಂದು ಘೋಷಿಸಬಹುದಿತ್ತು. ಈ ರೀತಿ 3 ಪಂದ್ಯಗಳ ಸರಣಿ ಆಯೋಜನೆ ಮಾಡಿದ್ದರೆ ಎರಡೂ ತಂಡಗಳಿಗೂ ಸರಿಸಮನಾದ ಅನುಕೂಲವಾಗುತ್ತಿತ್ತು ಎಂದು ಯುವರಾಜ್ ಸಿಂಗ್ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.