ಆರಂಭಿಕನಿರಬೇಕಾದ ತಾಂತ್ರಿಕ ನೈಪುಣ್ಯತೆ ಆತನಲ್ಲಿಲ್ಲ: ಭಾರತೀಯ ಆಟಗಾರನ ಬಗ್ಗೆ ಆಕಾಶ್ ಚೋಪ್ರ ಮಾತು

ಅರ್ಧ ಶತಕ ಸಿಡಿಸಿದರೂ ಗಿಲ್ ಬಗ್ಗೆ ಚೋಪ್ರಗೆ ಅಸಮಾಧಾನ

ನ್ಯೂಜಿಲೆಂಡ್ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯದಲ್ಲಿ ಟೀಮ್ ಇಂಡಿಯಾದ ಯುವ ಆರಂಭಿಕ ಆಟಗಾರ ಅರ್ಧ ಶತಕದ ಕೊಡುಗೆ ನೀಡಿದ್ದಾರೆ. ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್‌ನ ಫೈನಲ್‌ನಲ್ಲಿ ಭಾಗವಹಿಸಿದ್ದ ಶುಬ್ಮನ್ ಗಿಲ್ ನಂತರ ಗಾಯದ ಕಾರಣದಿಂದಾಗಿ ಇಂಗ್ಲೆಂಡ್ ವಿರುದ್ಧದ ಟೆಸ್ಟ್‌ನಿಂದ ಹೊರಗುಳಿದಿದ್ದರು. ಹೀಗಾಗಿ ಸುದೀರ್ಘ ಕಾಲದ ನಂತರ ಟೆಸ್ಟ್‌ನಲ್ಲಿ ಕಣಕ್ಕಿಳಿದ ಗಿಲ್ ಕಿವೀಸ್ ವಿರುದ್ಧದ ಮೊದಲ ಪಂದ್ಯದಲ್ಲಿ ಅರ್ಧ ಶತಕ ಸಿಡಿಸಿ ಮಿಂಚಿದ್ದಾರೆ. ಆದರೆ ಭೋಜನ ವಿರಾಮದ ನಂತರ ಕೈಲ್ ಜೇಮಿಸನ್ ಎಸೆತಕ್ಕೆ ಗಿಲ್ ಬೌಲ್ಡ್ ಆಗುವ ಮೂಲಕ ವಿಕೆಟ್ ಕಳೆದುಕೊಂಡಿದ್ದಾರೆ. ಆದರೆ ಶುಬ್ಮನ್ ಗಿಲ್ ಆರಂಭಿಕನಾಗಿ ನೀಡಿದ ಪ್ರದರ್ಶನದ ಬಗ್ಗೆ ಆಕಾಶ್ ಚೋಪ್ರ ಭಿನ್ನ ಹೇಳಿಕೆ ನೀಡಿದ್ದಾರೆ.

ಆರಂಭಿನಿರಬೇಕಾದ ಕೌಶಲ್ಯ ಇಲ್ಲ

ಶುಬ್ಮನ್ ಗಿಲ್ ಕಿವೀಸ್ ವಿರುದ್ಧ ಉತ್ತಮವಾಗಿ ರನ್‌ಗಳಿಸಿದರು ಕೂಡ ಆಕಾಶ್ ಚೋಪ್ರ ಪ್ರಕಾರ ಗಿಲ್ ಬಳಿ ಆರಂಭಿಕ ಆಟಗಾರನಿಗೆ ಇರಬೇಕಾದ ತಾಂತ್ರಿಕ ಕೌಶಲ್ಯ ಇಲ್ಲವಂತೆ. ಶುಬ್ಮನ್ ಗಿಲ್ ಅವರ ನಿಜವಾದ ಆಟ ಮಧ್ಯದ ಓವರ್‌ಗಳಲ್ಲಿಯೇ ಆರಂಭವಾಗುತ್ತದೆ ಎಂದಿದ್ದಾರೆ ಆಕಾಶ್ ಚೋಪ್ರ. ಹೀಗಾಗಿ 22ರ ಹರೆಯದ ಯುವ ಆಟಗಾರ ಆರಂಭಿಕನ ಸ್ಥಾನಕ್ಕೆ ಸೂಕ್ತವಾಗುವುದಿಲ್ಲ ಎಂದಿದ್ದಾರೆ. "ನಾನು ಯಾವಾಗ ಆತನ ಆಟವನ್ನು ನೋಡಿದರೂ ಆತ ಟೆಸ್ಟ್‌ನ ಆರಂಭಿಕ ಆಟಗಾರ ಎನಿಸುವುದಿಲ್ಲ" ಎಂದಿದ್ದಾರೆ ಆಕಾಶ್ ಚೋಪ್ರ.

ಸ್ಪಿನ್ನರ್‌ಗಳ ಎಸೆತಕ್ಕೆ ಅದ್ಭುತ ಪ್ರದರ್ಶನ

ಇನ್ನು ಇದೇ ಸಂದರ್ಭದಲ್ಲಿ ಆಕಾಶ್ ಚೋಪ್ರ ಶುಬ್ಮನ್ ಗಿಲ್ ಅವರು ಸ್ಪಿನ್ನರ್‌ಗಳ ವಿರುದ್ಧ ಹೊಂದಿರುವ ನೈಪುಣ್ಯತೆಯನ್ನು ಕೊಂಡಾಡಿದ್ದಾರೆ. "ಶುಬ್ಮನ್ ಗಿಲ್ ಸ್ಪಿನ್ನರ್‌ಗಳ ವಿರುದ್ಧ ಸೂಕ್ತವಾದ ತಾಂತ್ರಿಕತೆಯನ್ನು ಹೊಂದಿದ್ದಾರೆ. ಆತ ಸ್ಪಿನ್ನರ್‌ಗಳ ವಿರುದ್ಧ ಆಡುವಾಗ ಕಾಲುಗಳನ್ನು ಉತ್ತಮವಾಗಿ ಬಳಸುತ್ತಾರೆ. ಆತನ ಪಾದದ ಚಲನೆ ಅದ್ಭುತವಾಗಿದ್ದು ರಕ್ಷಣಾತ್ಮಕವಾಗಿಯೂ ಅತ್ಯುತ್ತಮವಾಗಿದ್ದಾರೆ. ಆತನ ಬ್ಯಾಟ್ ಯಾವಾಗಲೂ ಪ್ಯಾಡ್‌ನ ಮುಂದಿರುತ್ತದೆ" ಎಂದಿದ್ದಾರೆ ಆಕಾಶ್ ಚೋಪ್ರ.

ನನ್ನ ಪ್ರಕಾರ ಶುಬ್ಮನ್ ಗಿಲ್ ಮಧ್ಯಮ ಕ್ರಮಾಂಕದ ಆಟಗಾರ

ಇನ್ನು ಇದೇ ಸಂದರ್ಭದಲ್ಲಿ ಆಕಾಶ್ ಚೋಪ್ರ ಶುಬ್ಮನ್ ಗಿಲ್ ಅವರು ಮಧ್ಯಮ ಕ್ರಮಾಂಕಕ್ಕೆ ಸೂಕ್ತವೆನಿಸುವ ಆಟಗಾರ ಎಂದಿದ್ದಾರೆ. "ನನ್ನ ಅಭಿಪ್ರಾಯದ ಪ್ರಕಾರ ಶುಬ್ಮನ್ ಗಿಲ್ ಮಧ್ಯಮ ಕ್ರಮಾಂಕದ ಆಟಗಾರ. ಆತನನ್ನು ಆರಂಭಿಕ ಆಟಗಾರನನ್ನಾಗಿ ಮಾಡಲಾಗಿದೆ. ಆತ ಆರಂಭಿಕನಾಗಿಯೂ ಉತ್ತಮವಾಗಿ ಆಡಿದ್ದಾರೆ. ಆದರೆ ಆತನ ನೈಜ ಆಟ ಹಾಗೂ ನಿಜವಾದ ಫಾರ್ಮ್ ಮಧ್ಯಮ ಕ್ರಮಾಂಕದಲ್ಲಿ ವ್ಯಕ್ತವಾಗಲಿದೆ" ಎಂದಿದ್ದಾರೆ.