ತಂಡವನ್ನು ಕಟ್ಟುವುದು ಹೀಗಲ್ಲ: ಮಯಾಂಕ್ ಅಗರ್ವಾಲ್ ಕೈಬಿಟ್ಟ ಪಂಜಾಬ್ ಕಿಂಗ್ಸ್ ನಡೆಗೆ ದೊಡ್ಡ ಗಣೇಶ್ ಕಿಡಿ

ನಾಯಕನಾಗಿ ಮಿಂಚಲು ವಿಪಲವಾದ ಮಯಾಂಕ್ ಅಗರ್ವಾಲ್

ಕಳೆದ ಆವೃತ್ತಿಯಲ್ಲಿ ಪಂಜಾಬ್ ಕಿಂಗ್ಸ್ ತಂಡದ ನಾಯಕನಾಗಿ ತಂಡವನ್ನು ಮುನ್ನಡೆಸಿದ್ದ ಮಯಾಂಕ್ ಅಗರ್ವಾಲ್ ತಂಡದ ಪರ ನಿರೀಕ್ಷಿತ ಪ್ರದರ್ಶನ ನೀಡಲು ವಿಫಲವಾದರು. 13 ಪಂದ್ಯಗಳಲ್ಲೂ ಕಣಕ್ಕಿಳಿದಿದ್ದ ಮಯಾಂಕ್ ಅಗರ್ವಾಲ್ ಕೇವಲ 196 ರನ್‌ ಗಳಿಸಲಷ್ಟೇ ಶಕ್ತವಾಗಿದ್ದರು. ಇನ್ನು ಆರಂಭಿಕನಾಗಿ ಕಣಕ್ಕಿಳಿಯುತ್ತಿದ್ದ ಮಯಾಂಕ್ ಅಗರ್ವಾಲ್ ಮಧ್ಯಮ ಕ್ರಮಾಂಕದಲ್ಲಿ ಬ್ಯಾಟಿಂಗ್ ನಡೆಸುವ ನಿರ್ಧಾರ ಕೂಡ ಸೂಕ್ತ ನಿರ್ಧಾರ ಎನಿಸಿರಲಿಲ್ಲ. ಇದು ಫಲಿತಾಂಶದ ಮೇಲೂ ಪರಿಣಾಮ ಬಿದ್ದಿತ್ತು.

ದೊಡ್ಡ ಗಣೇಶ್ ಅಸಮಾಧಾನ

ಇನ್ನು ಪಂಜಾಬ್ ಕಿಂಗ್ಸ್ ತಂಡ ನಾಯಕತ್ವದಿಂದ ಮಯಾಂಕ್ ಅಗರ್ವಾಲ್ ಅವರನ್ನು ಕೆಳಗಿಳಿಸಿ ತಂಡದಿಂದಲೇ ಕೈಬಿಟ್ಟ ನಿರ್ಧಾರಕ್ಕೆ ಮಾಜಿ ಕ್ರಿಕೆಟಿಗ ದೊಡ್ಡ ಗಣೇಶ್ ಕಿಡಿಕಾರಿದ್ದಾರೆ. ಟ್ವಿಟ್ಟರ್‌ನಲ್ಲಿ ಈ ಬಗ್ಗೆ ದೊಡ್ಡ ಗಣೇಶ್ ತಮ್ಮ ಅಭಿಪ್ರಾಯವನ್ನು ಹಂಚಿಕೊಂಡಿದ್ದಾರೆ. "ಪಂಜಾಬ್ ಪರವಾಗಿ ಮಯಾಂಕ್ ಅಗರ್ವಾಲ್ ನಾಲ್ಕು ಅದ್ಬುತ ಸೀಸನ್‌ಗಳಲ್ಲಿ ಅದ್ಭುತ ಪ್ರದರ್ಶನ ನೀಡಿದ್ದರು. ಒಂದು ಕೆಟ್ಟ ಆವೃತ್ತಿಯಿಂದಾಗಿ ಅವರು ತಂಡದಿಂದಲೇ ಹೊರಬಿದ್ದಿದ್ದಾರೆ. ಈ ಕಾರಣದಿಂದಾಗಿಯೇ ಸಿಎಸ್‌ಕೆ ಹಾಗೂ ಎಂಐ ತಂಡಗಳು ಭಿನ್ನ ಎನಿಸಿಕೊಳ್ಳುವುದು. ತಮ್ಮಲ್ಲಿರುವ ಆಟಗಾರರನ್ನು ಬಳಸಿಕೊಂಡೇ ಈ ಎರಡು ಯಶಸ್ವಿ ತಂಡಗಳು ತಂಡವನ್ನು ಕಟ್ಟುವುದು ನಿಜಕ್ಕೂ ವಿಶೇಷ" ಎಂದಿದ್ದಾರೆ ದೊಡ್ಡ ಗಣೇಶ್.

ದೊಡ್ಡ ಮೊತ್ತದೊಂದಿಗೆ ಹರಾಜಗಿಳಿಯಲಿದೆ ಪಂಜಾಬ್

ಇನ್ನು ಪಂಜಾಬ್ ಕಿಂಗ್ಸ್ ಫ್ರಾಂಚೈಸಿ ಮುಂದಿನ ಮಿನಿ ಹರಾಜು ಪ್ರಕ್ರಿಯೆಗೆ ದೊಡ್ಡ ಮೊತ್ತದ ಪರ್ಸ್‌ನೊಂದಿಗೆ ಸಿದ್ಧವಾಗಿದೆ. 32.2 ಕೋಟಿಯಷ್ಟು ಮೊತ್ತವನ್ನು ಪಂಜಾಬ್ ಕಿಂಗ್ಸ್ ತಂಡ ಹೊಂದಿದ್ದು ಮೂರು ವಿದೇಶಿ ಆಟಗಾರರ ಸ್ಥಾನ ಬಾಕಿಯಿದೆ. ಹೀಗಾಗಿ ಈ ಮುಂಬರುವ ಐಪಿಎಲ್‌ನಲ್ಲಿ ಸಂಪೂರ್ಣ ಹೊಸತನದೊಂದಿಗೆ ಕಣಕ್ಕಿಳಿಯಲಿದೆ. ಶಿಖರ್ ಧವನ್ ನಾಯಕತ್ವದಲ್ಲಿ ತಂಡ ಬಲಿಷ್ಠವಾಗಿ ಕಣಕ್ಕಿಳಿಯುವ ವಿಶ್ವಾಸದಲ್ಲಿದೆ. ಐಪಿಎಲ್‌ನಲ್ಲಿ ಈವರೆಗೆ ಟ್ರೋಫಿ ಗೆಲ್ಲಲು ವಿಫಲವಾಗಿರುವ ತಂಡಗಳ ಪೈಕಿ ಪಂಜಾಬ್ ಕಿಂಗ್ಸ್ ಕೂಡ ಒಂದಾಗಿದ್ದು ಮುಂದಿನ ಐಪಿಎಲ್‌ನಲ್ಲಿ ಯಾವ ರೀತಿಯ ಪ್ರದರ್ಶನ ನೀಡಲಿದೆ ಎಂಬುದು ಕುತೂಹಲ ಮೂಡಿಸಿದೆ.