ಇಂಡಿಯನ್ ಸೂಪರ್ ಲೀಗ್ನ 22ನೇ ಪಂದ್ಯದಲ್ಲಿ ಬೆಂಗಳೂರು ಎಫ್ಸಿ ಹಾಗೂ ಹೈದರಾಬಾದ್ ಎಫ್ಸಿ ತಂಡಗಳು ಮುಖಾಮುಖಿಯಾಗಿದ್ದವು. ಈ ಪಂದ್ಯದಲ್ಲಿ ಮತ್ತೊಮ್ಮೆ ಬಿಎಫ್ಸಿ ತಂಡ ಸೋಲಿನ ಮೂಲಕ ನಿರಾಸೆ ಅನುಭವಿಸಿದೆ. ಬೆಂಗಳೂರು ವಿರುದ್ಧ ಹೈದರಾಬಾದ್ ಎಫ್ಸಿ ತಂಡ 1-0 ಅಂತರದಿಂದ ಗೆಲುವು ಸಾಧಿಸಿದೆ. ಈ ಮೂಲಕ ಟೂರ್ನಿಯಲ್ಲಿ ಬಿಎಫ್ಸಿ ತಂಡ ಆಡಿದ ಐದು ಪಂದ್ಯಗಳ ಪೈಕಿ ಮೂರನೇ ಸೋಲು ಅನುಭವಿಸಿದೆ.
ಪಂದ್ಯ ಆರಂಭವಾದ ಏಳನೇ ನಿಮಿಷದಲ್ಲಿಯೇ ಹೈದರಾಬಾದ್ ಎಫ್ಸಿ ತಂಡ ಗೋಲು ದಾಖಲಿಸಿ ಪಂದ್ಯದಲ್ಲಿ ಮುನ್ನಡೆಯನ್ನು ಸಾಧಿಸುವಲ್ಲಿ ಯಶಸ್ವಿಯಾಗಿತ್ತು. ನೈಜೀರಿಯನ್ ಮೂಲದ ಫುಟ್ಬಾಲ್ ಆಟಗಾರ ಬಾರ್ತಲೋಮೆವ್ ಒಗ್ಬೆಚೆ ಈ ಗೋಲು ಗಳಿಸುವ ಮೂಲಕ ಹೈದರಾಬಾದ್ ತಂಡಕ್ಕೆ ಮುನ್ನಡೆ ಒದಗಿಸಿದರು. ಈ ಮುನ್ನಡೆಯನ್ನು ಹೈದರಾಬಾದ್ ಎಫ್ಸಿ ತಂಡ ಕಡೆಯವರೆಯೂ ಕಾಪಾಡಿಕೊಳ್ಳುವಲ್ಲಿ ಯಶಸ್ವಿಯಾಯಿತು. ಬೆಂಗಳೂರು ಎಫ್ಸಿ ಪಂದ್ಯದುದ್ದಕ್ಕೂ ಯಾವುದೇ ಗೋಲು ದಾಖಲಿಸುವಲ್ಲಿ ಸಫಲವಾಗಲಿಲ್ಲ. ಅಂತಿಮವಾಗಿ ಪಂದ್ಯದಲ್ಲಿ 0-1 ಅಂತರದಿಂದ ಸೋಲು ಒಪ್ಪಿಕೊಂಡಿದೆ.
2022 ಬೀಜಿಂಗ್ ಚಳಿಗಾಲದ ಒಲಿಂಪಿಕ್ಸ್: ರಾಜತಾಂತ್ರಿಕ ಬಹಿಷ್ಕಾರಕ್ಕೆ ಆಸ್ಟ್ರೇಲಿಯಾ ನಿರ್ಧಾರ
ಈ ಮೂಲಕ ಬಿಎಫ್ಸಿ ಕಳೆದ ನಾಲ್ಕು ಪಂದ್ಯಗಳಲ್ಲಿ ಗೆಲುವಿನ ರುಚಿ ನೋಡಲು ಸಾಧ್ಯವಾಗದಂತಾಗಿದೆ. ಟೂರ್ನಿಯ ಆರಂಭಿಕ ಪಂದ್ಯದಲ್ಲಿ ಬಿಎಫ್ಸಿ ನಾರ್ಥ್ಈಸ್ಟ್ ಯುನೈಟೆಡ್ ಎಫ್ಸಿ ವಿರುದ್ಧ 4-2 ಅಂತರದಿಂದ ಭರ್ಜರಿ ಗೆಲುವು ಸಾಧಿಸಿದ ಬಳಿಕ ಒಂದು ಪಂದ್ಯದಲ್ಲಿಯೂ ಗೆಲುವು ಸಾಧಿಸಲು ವಿಫಲವಾಗಿದೆ. ಮೂರು ಪಂದ್ಯಗಳಲ್ಲಿ ಸೋಲು ಕಂಡಿದ್ದರೆ ಒಂದು ಪಂದ್ಯವನ್ನು ಡ್ರಾಗೊಳಿಸಿದೆ.
ಇನ್ನು ಈ ಸೋಲಿನೊಂದಿಗೆ ಬೆಂಗಳೂರು ಎಫ್ಸಿ ತಂಡ ಅಂಕಪಟ್ಟಿಯಲ್ಲಿ ಮತ್ತಷ್ಟು ಕುಸಿತವನ್ನು ಕಂಡಿದೆ. 8ನೇ ಸ್ಥಾನದಲ್ಲಿದ್ದ ಬಿಎಫ್ಸಿ ತಂಡ 9ನೇ ಸ್ಥಾನಕ್ಕೆ ಕುಸಿದಿದೆ. ಇತ್ತ ಹೈದರಾಬಾದ್ ಎಪ್ಸಿ ತಂಡ ಬಿಎಫ್ಸಿ ವಿರುದ್ಧ ಸಾಧಿಸಿದ ಈ ಗೆಲುವಿನಿಂದಾಗಿ ಭಾರೀ ಏರಿಕೆ ಕಂಡಿದೆ. ಆಡಿದ ನಾಲ್ಕು ಪಂದ್ಯಗಳಲ್ಲಿ ಎರಡು ಪಂದ್ಯ ಗೆದ್ದಿರುವ ಹೈದರಾಬಾದ್ ಎಫ್ಸಿ ತಂಡ 7ನೇ ಸ್ಥಾನದಿಂದ 3ನೇ ಸ್ಥಾನಕ್ಕೆ ಏರಿಕೆ ಕಂಡಿದೆ.
ವಿಜಯ್ ಹಜಾರೆ ಟ್ರೋಫಿ 2021: ಮಹಾರಾಷ್ಟ್ರ ತಂಡವನ್ನ ಮುನ್ನಡೆಸಲಿರುವ ರುತುರಾಜ್ ಗಾಯಕ್ವಾಡ್
ಬೆಂಗಳೂರು ಎಫ್ಸಿ ಪ್ಲೇಯಿಂಗ್ XI: ಗುರುಪ್ರೀತ್ ಸಂಧು (ಗೋಲ್ಕೀಪರ್), ರೋಶನ್ ನವೋರೆಮ್, ಪ್ರತೀಕ್ ಚೌಧರಿ, ಅಲನ್ ಕೋಸ್ಟಾ, ಆಶಿಕ್ ಕುರುನಿಯನ್, ಜಯೇಶ್ ರಾಣೆ, ಸುರೇಶ್ ವಾಂಗ್ಜಮ್, ಬ್ರೂನೋ ಸಿಲ್ವಾ, ಎಡ್ಮಂಡ್ ಲಾಲ್ರಿಂಡಿಕಾ, ಕ್ಲಿಟನ್ ಸಿಲ್ವಾ ಮತ್ತು ಸುನಿಲ್ ಛೆಟ್ರಿ (ನಾಯಕ)
ಹೈದರಾಬಾದ್ ಎಫ್ಸಿ: ಲಕ್ಷ್ಮೀಕಾಂತ್ ಕಟ್ಟಿಮನಿ (ಗೋಲ್ಕೀಪರ್), ಚಿಂಗ್ಲೆನ್ಸನಾ ಸಿಂಗ್, ಜುವಾನನ್, ಆಕಾಶ್ ಮಿಶ್ರಾ, ಆಶಿಶ್ ರೈ, ಜೊವೊ ವಿಕ್ಟರ್ (ನಾಯಕ), ನಿಖಿಲ್ ಪೂಜಾರಿ, ಸೌವಿಕ್ ಚಕ್ರಬರ್ತಿ, ರೋಹಿತ್ ದಾನು, ಜೇವಿಯರ್ ಸಿವೆರಿಯೊ ಮತ್ತು ಬಾರ್ತಲೋಮಿವ್ ಓಗ್ಬೆಚೆ